|
|
|
Meðferðir og upplýsingar
Þegar par hefur verið greint með ófrjósemi tekur oftast nær við
einhvers konar meðferð við henni. Þessi meðferð er sniðin að hverju
pari fyrir sig en aðallega eru það 3 meðferðir sem valið er um.
Tæknisæðingar og glasafrjóvganir eru algengustu meðferðirnar en sum pör
þurfa á smásjárfrjóvgun að halda.
Allar meðferðir fara fram á glasafrjóvgunarstöðinni ART
Medica, sem er til húsa að Bæjarlind 12 í Kópavogi. Hægt er að panta
tíma í síma: 515-8100.
Greiðslur stéttarfélaga:
Mörg stéttarfélög á Íslandi taka þátt í kostnaði félagsmanna sinna við
glasafrjóvganir. Þessi listi hér er langt frá því tæmandi, hann er
aðeins yfir þau félög sem Tilveru er kunnugt um að greiði (eða greiði
ekki) fyrir meðferðir og/eða ættleiðingar. Hver sá sem er í
stéttarfélagi og þarf að gangast undir meðferð á tæknifrjóvgunardeild,
ætti að kynna sér reglur síns stéttarfélags um þessa hluti. Jafnvel
þótt ekkert liggi fyrir um að stéttarfélagið styrki svona meðferðir er
það vel þess virði að senda inn umsókn um styrk, því það er aldrei að
vita nema viðkomandi hljóti styrk, enda þótt styrkur hafi aldrei verið
veittur áður.
Ef par er í sama stéttarfélagi hefur hvort um sig yfirleitt rétt til
endurgreiðslu eins og reglur stéttarfélagsins kveða á um. Þó er
yfirleitt ekki hægt að sækja bæði um styrk fyrir sömu meðferðina.
Einnig þarf að hafa í huga að sum stéttarfélög takmarka réttindi
félagsmanna sinna við að þeir hafi borgað ákveðinn tíma til félagsins,
við starfshlutfall eða önnur atriði og því þarf að skoða hvort slík
skilyrði eru tilgreind í reglum sjúkrasjóðsins áður en hægt er að slá
því föstu að fullur styrkur eins og hann er gefinn upp hér á þessari
síðu fáist.
Athugið einnig að Tilvera tekur ekki ábyrgð á því að eftirfarandi upplýsingar séu réttar.
Allar leiðréttingar og ábendingar um styrkveitingar stéttarfélaga í þessu skyni má senda á tilvera@tilvera.is.
|
|
|
|
|
|
|
|
|